*******الحب ********
___________محمودعمار الزلباني *****
*******************************
يعني إيه القلب يعشق
ولا حتى العين تميل
ولا سهم النظرة يرشق
والفكر يبقى نهار وليل
________________
لما صوت القلب يطلع
يبقى ناوي ع الغرام
تلاقي لون الخد يلمع
يبقى حب مفيش كلام
_______________
لما تسهر بالليالي
وتلاقي نفسك ديما سارح
ويبقى حالك زي حالي
يبقى شجر الحب طارح
________________
لما تلمس إيدحبيبك
زي لمسة سلك عاري
اللي صاب قلبه يصيبك
تلاقي نفسك بيك ما داري
_________________
افتح القلب تلاقيه
نفسه يخرج بره منك
إنت قافل ليه عليه
ولا خايف منه عنك
______________
الحياة بالحب حلوة
زي بستان الورود
كل وردة تشوفها غنوة
عطرها من غير حدود
________________
الحياة بالحب فرحة
ليه نفكر في الهموم
الهموم للقلب جارحة
ونخلي كل عزول يلوم
________________
الله على عد النجوم
وإنت سارح في الحبيب
يا ترى يجيلك في يوم
تتمنى جرحك بيه يطيب
_______________
يللي غاوي الحزن روح
إوع تيجي ف يوم حدانا
ليه تفكرنا بجروح
الحب ليها كان دوانا
________________
الحب ليه في العين علامة
رايح فيها النني جاي
ودمعها يالله السلامة
ع الحبيب يا ريت معاي
______________
الحب خلى العمر طال
كل لحظة فيه سنين
يا ما غير حال لحال
حتى داب منه الآنين
________________
الحب فيه القلب صاحي
بعد نوم أيام طويلة
يا ما نور بيه ضواحي
ونوره زين ألف ليلة
*************** محمودعمار الزلباني
ليست هناك تعليقات:
إرسال تعليق