( ترابك و طينك)
أتمرمغ فى ترابك وآكل من طينك
ولا إني أهاجر و أسيبك
******
أميّل على اخواتى وأنادي على جيراني
أروح قبلى أو بحرى زى ما يعجبنى
هنا أو هنا الكل أهلى و أحبابى
مية شهد و سكر م الزلعة
و اللمة تحلى بأصحابى
مسك وعنبر فى نسمة تلاعبنا ويا العصارى
حرّك ضلة و حياتك و بردك جنة أيامى
و ف ليلك تحلى أحلامى
و أتمرمغ ف ترابك وآكل من طينك
و لا إنى أهاجر و أسيبك
********
أتوضا من ميّة نيلك و انا ماسك على د ينى
و أحبك على إيدك ترضى عنى و إن مت إفتكرينى
على أرضك قاعد بين الزرعة و كام نخلة
ف أرضك إحضنينى
و أهى كلمة حلوة سامعها ....... أيوووووووووه
الحلوة سمعت لمت شالها على خدودها
قالت لابوها وخالها لما سألوها
و ماله يامّا من بحرى و بنحبوه
وربابه و ناى و أحلى موال
...... يابوووووووى
وقعت منها الجرة ما هى مكسوفة
طلبها من ناسها و نادوها
لمحوا خجلها و إيديها مرعوشة
فهموا غرضها خطبها وشبكوها
و آدى الفرح كفوف و دفوف ..ليها شنة ورنة
و ف الترح دموع وقلوب فيها رحمة و أنّة
كل دا ألاقيه فين
وليه أحرم منه العين
دا أنا أتمرمغ ف ترابك وآكل من طينك
و لا إني أهاجر و أسيبك
********
أبو طبلة يدور ويلف شوارع وحوارى
فرحان تلاتين يوم جاله شهر الصوم تانى
المدفع يضرب والفانوس ينور و لافيش نوم الليالى
ياللا تعالى باسمله .. يارب إقبل وكفر عنا يا بارى
و الليلة عيد ع الدنيا سعيد يا غالى
فين العيدية يا با و يا عمى و يا خالى
كل دا ألاقيه فين و ليه أحرم منه العين
دا أنا أتمرمغ ف ترابك و آكل من طينك
و لا إني أهاجر و أسيبك
********
قريبى وقريبك على عرفات
و جارنا بضحيته يزورك ويقولك بعودة و هنية
و زغرودة حلوة رنت فى بيتنا
نجحت بنت جارتنا وكمان ابنك ف الثانوية
وجانا الشريات من آخر الحارة هدية
و صاحبى و صاحبك إدالو ربى وربك
صبى أو صبية ألف مبروك يتربى ف عزك
و دق الهون و هز المنخل
و رش ملح و حلويات
إجري يا صاحبي نلحق الواد إبن فلان و فلانة
طالع شقى عشانه قامت عركة و خناقة
جريت معايا لاجل نحوش و تروق الدنيا
سبقونا اللى قلوبهم صافية مصفية
روحنا لاقينا نكتة و ضحكة مدوية
و قفشة ذكية ما فيش كدا ف الدنيا
كل دا ألاقيه فين و ليه أحرم منه العين
دا انا اتمرمغ ف ترابك و آكل من طينك
و لا إني أهاجر و أسيبك
*********
أيوة جيبى فاضي لكن راضي و النومة هنية
و اهو يوم فوق و يوم تحت و آهي مقضية
صاحبي نادانى... يا صاحبي تعالى نتمشى شوية
ع الكورنيش تحكى معايا و نركب معدية
ياعم اشويلنا الدرة قال حاضر من عينيا
ياخال شوية ترمس و اتوصى بينا شوية
ياحلو ياللى ماشى سلم و ماتقساشي
.. بلاش التقل دا عليا و انت ماشي
بجنب عينيها بصتلي و بورد خدودها سحرتني
يا واد انا غالية على ناسى و مهرى غالى
رديت .. ياحلو لاجل ما ترضى عليا
أقدم قلبى وروحى عشانك هدية
قالت ولو .... سيبك م الحكاية دية و الحركادي
اتشطر و روح لبيت أبويا ف الحارة دية
و خد منه و ادي هاتفرح بيا
كل دا ألاقيه فين و ليه أحرم منه العين
دا انا أتمرمغ ف ترابك و آكل من طينك
ولا إني أهاجر و أسيبك
********
صباحكوا قشطة و فل و ياسمين
يا منورين الكراسي يا حلوين
كباية شاي ع الماشي
لاجل عينيا تفتح و توزن راسي
فين الاسطى فلان يقضيلي الشغلانة دية
أيوة ياباشا أنا محسوبك تؤمر و من عينيا
ياللا بينا .. وسلام ياصحابي أشوفكوا المغربية
تسلم إيدك ايه الشطارة دية
و اؤمر طلباتك كام ف الصنعة دية
خللى ياذوق بسيطة و ما هياش قضية
يابتاع الفاكهة هات من دىي و ده و راعيني شوية
يا مّا انت صاحية و لا نايمة و مين سأل عليا
خدي يا ما من رزق ربي ليا
تسلم يابنى مجايبك ليا ولا يحرمنيش عطفك عليا
كل دا ألاقيه فين و ليه أحرم منه العين
دا أنا أتمرمغ ف ترابك و آكل من طينك
ولا إني أهاجر و أسيبك
*********
